تبلیغات
دانش بومی
  • تازه ترین مطالب:
آخرین مطالب
چه خشه برف بزنه ره بسه بوهه

چه خشه برف بزنه ره بسه بوهه                زلف زال  قد بلند نشسه بوهه

هی بگو ایخوم برم ای برف  نیله             دل مو سی موندنش تپسه بوهه

*****

چه خشه بارون بیا من شو زمسون          شرشرش من گوشمو هاتون هاتون

تش برق پشت سرش تونه ایلرزه            وریسی چی بخری پشتش یه قیلون

*****

دم صبح غروس گپو بنگه شرو که           دنیا نه من دقی خش زیر رو که

چخ چخ بی شازمون رسی و گوشم          فهمیدم که صبحگه کاره شرو که


*****

تیمه یواشکی خ چرخنایم                         سرمه ری وه اجاق واپیتنایم

بو قیلون دی چی ایخه کیفور بیذن            یه دور ده ملی لحاف واپیچنایم

*****

دلمی خو یه دف ده دوری نها بو             حرفل قوم و خویشل سی یک دوا بو

نه جری نه دلخری نه هم حسیتی              همیه آبادیمو مثل ککا بو

*****

دلمی خو از نو بیا سالل برفی              وریسم خم بزنم من شو یه چرخی

تو بگو چه وابیده دنیا زرونه                 ای همه پیدا وابی اوقات تلخی

*****

چه خشه سایه کمر دلی بلی دون            باد دم دم بزنت هاتون هاتون

بزنی یه مونگکی تا ظهر وابو                  باغچته واز بکنی و بخری نون

*****

چه خشه سایه سه چی رز بیذ گردو        باد گلل بزنه وی سو وهر سو

بدنت ویچو وخو روحت وشهره           بزنی نالی بلند یار خَوَرا بو

*****

یاد میا دلی شفی موسیش کبابم             هرچی بنگشی کنم نیذه جوابم

سربد دیدگه سیل وَ کله باز                هرشو من خومیا  مو سیش کبابم

*****

کل برکو ری و قبله صحری مصری             بو چلتیک ایا وبوت و ره دیری

دم پسین من حلپه زار تا چال کناری             ایدویی تا برسی و شهر مصیری

*****

مصیری عشق منه عشق وراسی                   ای حرف سیتی زنم بی رو درواسی

حرفل دلمی زنم که خوت بدونی              مو معنی سیتی کنم یکه شناسی

*****

یاد بو بازم همش دوری نها بو                 پشت سر تا وجلو همش خذا بو

بین ما و دورل ، خاله و خرزو                  همیشه مس اوسنی حجب وحیا بو

*****

ای خذا میرزا جلال دلت کرویه               ایدلت و آباذی همش گرویه

په چته نبدی زنی مثل پلنگل                     ای دلت هر شو رو همش و رویه

*****

همیچو تموم کنش بره مصری                 چرخه چرخه بزنه وره دیری

بگرش احمد خمو یه دف بخونش            من وبلاگش بنه سی شهر مصیری

تاریخ ششم و هفتم دی ماه/91. تهران

جلا یوسفی




طبقه بندی: ادبیات شفاهی،
برچسب ها: برف، جلال یوسفی، تهران، عشق، مصیری،
 شنبه 1391/10/9  09:08    admin